呢兩日天氣終於有回暖氣息，雖然係濕𣲷𣲷但都無礙一眾購物精如我的興緻。但係日買夜買，水源唔充足者唯有諗計將平衫襯出偽貴價look，呢四招大家不妨記低，以備不時之需。
一、同色系（Tone-on-tone）搭配
潮人最愛全黑打扮，全身着同色系的確是穩陣之選，但其實這一招也可令平凡衣物顯得高質。Tone-on-tone襯法精妙之處，在於運用不同剪裁和布料互相配搭，襯埋同色系嘅鞋仲可以視覺上拉長身高比例，望落去更高佻。唔只黑色，白色、灰色同裸粉色系都係近年tone-on-tone襯法常見顏色。
二、一種花紋走天下
將唔同印花混搭極考襯衫功力，稍一不慎襯得唔好，隨時令放大視覺上身材比例，兼令靚衫變得廉價。學識每套outfit只將重點放在一種花紋上，其他配襯用純色配搭，可以突顯花紋材質又貴氣。
三、入手高質外套
時尚人最愛講層次感，隨手一件靚外套一定走唔甩，仲可以乘機cover內襯服裝，幾平價嘅內襯都變得唔明顯；揀啱質地同款式仲分分鐘着幾季，拉番勻都抵。但靚唔只講究價錢，揀件剪裁合身、質地襟着、唔易起毛粒嘅外套就夠利落，夠照！
四、戴上吸睛小物
即使衣着平凡，身上亮眼小物都可以即時為全身造型加分，也可以透過混搭多枚小戒指等小配件，襯出個人風格，畫龍點睛。最重要嘅係，呢啲小物mix and match幾多次都唔會有太多人發現，重覆配搭率好高！
記者：黃樂雯
