一向斯文嘅白鴿黨何俊仁，噚日出席立法會特別財委會時罕有爆seed，兩次大力拍枱，拍到個玻璃杯都一度彈起，因發展局官員回應強拍問題時，就強拍法例講啲唔講啲，認為官員誤導，在席嘅發展局局長陳茂波見仁哥咁嬲，就話政府無意誤導；仁哥聞言更火滾：「如果無意，點解你頭先唔出聲？」坦言「我都好少好少發咁嘅脾氣」。茂波就話代同事向仁哥道歉，話會檢討仁哥關注嘅問題喎。
黨友單仲偕則喺會上明寸標榜「真係見過Steve Jobs」嘅創科局局長楊偉雄：「知道局長真係見過Steve Jobs，真係見過，但我都睇過Steve Jobs套戲。」楊偉雄回應時搞笑話：「多謝你提一提我見過Steve Jobs。」隨即話見到Steve Jobs嘅時間係1977年4月17日，對方當時廿零歲，仲未成名喎。