抽水呃like係大勢，相信大家都深明此理，所以爆出「叫我梁特首」事件後，商舖都趁機抽吓水。心燒食堂噚日喺facebook專頁宣佈，為顯示顧客有「特權」及「超然地位」，特別推出優惠，凡食客落單時大叫「叫我梁特首」，就可獲贈「梁特手」（特權手羽先）雞翼一隻，優惠期至本月底。
其實心燒食堂過往經常推出與時事有關嘅優惠，好似年初CY喺施政報告多次提出一帶一路，佢哋隨即推出帶子同露筍為主打嘅「一帶一怒」，歡迎顧客一啖怒吞落肚。
而Neway今次都加入抽水行列，喺facebook整咗段對話，引述客人陳小姐向佢哋職員話喎：叫我陳經理，聲稱搞到fb小編好惆悵，疑惑日後稱呼客人係咪一定要加職級？