特區嘅第一家庭，真係有啲似愛生事家庭，鑊鑊新鮮鑊鑊金，呢次輪到梁太唐青儀大鬧機場，梁振英更涉嫌「撻朵」向機場職員施壓，以便將細女梁頌昕嘅手提行李直送禁區，官威之大直迫習大大。
原來教育界立法會議員葉建源（圖）聖誕去日本時，都試過將手提行李漏低喺check-in櫃枱，當時機場人員同身在候機室嘅佢講，要拎番行李，唯一方法係親自出番離境大堂領取，職員當時亦重申要再辦一次離境同行李檢查手續，仲話明一定要物主拎住做檢查，因為機場人員係絕不會將未經檢查嘅行李送入候機室㗎。佢話嗰次一來一回，都用咗成大半個鐘，但梁特疑似撻朵後，即有人肉速遞行李服務喎，係咪好羨慕？佢笑笑口話：「或者當時我可以講一句『叫我葉議員』，行李就可以自動送到！」