青年事務委員會主席、Package Lau劉鳴煒早前變身作家，寫咗篇文談青年問題，卻被批評太長氣，最近搵咗智經一位綽號「Harvard Law Rapper」同事幫手，將篇悶稿化成rap歌。
劉鳴煒喺fb話呢位rapper睇完佢篇29頁嘅稿後，用咗不足兩個鐘，就將之改成英文歌詞，整咗首rap歌。睇番呢首歌嘅歌詞，其實都好有意思，除咗呼籲年輕人想爭取民主就要記住投票，仲話條條大路通羅馬，成功方法唔使單一化，希望家長對年輕人多啲稱讚、少啲責罵。
咁，英文了得嘅劉鳴煒，片中有冇rap番兩嘴？有呀，佢真係講咗句英文，就係一個「Hi」字（圖），之後就企埋一邊，跟住首歌嘅節奏係咁點頭。如果大家想睇劉鳴煒點「Hi」法，可以到佢 http://hello.mingwailau.hk 。