香港正式進入後電視大戰時代！隨住Viu TV開台，香港人終於在失去亞視幾日後，重新獲得多一個睇電視嘅選擇！但多多一個台唔代表啲乜嘢，重點係做電視嗰班人，係咪真係知道觀眾要啲咩？
《蘋果動新聞》直接剷入社群，走訪一眾街坊，任由觀眾發揮創意，創作佢哋想睇嘅節目，終於集百家大成推出今年度【街坊電視節目巡禮】！究竟街坊們有乜勁爆「艾啲牙」？做開電視嘅電視人又捉唔捉到觀眾條路？
答案梗係唔會喺度講啦，畀你哋估到小編就唔係食神啦，老規矩，#咁重要嘅嘢梗係睇片啦！
2016年【街坊電視節目巡禮】推介電視節目，黃金時間排陣（好似係）：
晚上6:30《巴黎多姿采》～隆重推出【誰想看系列】旅遊真人騷。點啫！iPhone SE都可以攞嚟賣，點解《巴黎多姿采》唔可以？
晚上7:30《置業處男》～繼《愛回家》後，以真實儲首期故事為藍本嘅長壽實況喜劇，紀錄男女主角長達25年嘅儲首期過程
晚上8:30《警鬼情未了》～ 最高收視劇目，照抄《鬼同你OT》聯乘《EU超時任務》
晚上9:30《鴨脷洲真係好咩》～本土情懷系列，九龍人山長水遠去到鴨脷洲嘅驚險歷奇節目
晚上10:30《香港陸沉》～本土政治民生悲情劇目
凌晨12:30《做功課哈芝麻》～為本地學童作息時間度身訂造，同學們終於做完功課，隨即可以收睇，全港首創凌晨兒童節目
你又鍾意邊個節目？如果畀個電視台你搞，你又有無更爆嘅節目「艾啲牙」？留言sell吓橋吖笨。
（*以上節目為街坊創意精選，如有雷同，實屬撞橋）