沙士一役的得益？
掛起面罩，再沒有人覺得你奇怪，另加太陽墨鏡、帽子，整張臉孔消失，百分之九十自我失蹤，不少人樂於隱蔽身份行走江湖！
常覺這類人活得辛苦，做明星啫，不論那行那業，你以為自己係ET咩？
睇睇發仔哥幾逍遙自在，除了一副避太陽強光墨鏡，全身自然開放想去邊悉隨尊便，遊山玩水，沿窩打老道行去佐敦踩背脊，共群眾影Selfie 永不甩拖。
又睇睇阿倫哥，哨街搵食，不過一雙近視鏡，融入街坊左鄰右里打招呼不知多隨和。
一個影，一個影與歌，兩個都係影帝歌帝大阿哥中的大阿哥都未擺款，那麼早，靜安香格里拉已經相當安靜貴賓Lounge早餐區，突然出現ET走難逃亡包裝冇面男，另加身邊幾個助手/保安，還以為冒犯走進人家拍戲現場。入電梯，見其他人在，神神經經即刻在助手重重包圍下彈開。
到此為止，冇面男演繹不是成功而是極端失敗，未被路人認出誰啊誰。正常情況，如若真正巨星，縱使用麻包袋笠着，一樣會被人認出。
既然存心做公眾人物，賺公眾錢財，吃公眾給予的飯，何必將群眾拒諸千里之外？
相對，廣州老友記老區抵讚千萬！
公然赤裸，挺着幾廿歲依然挺拔光滑屁股，走遍世界著名景點，尤其政治光環地段：天安門廣場、上海外灘、香港金紫荊廣場、廣州小蠻腰電視塔、巴黎鐵塔……不留半絲半縷真赤裸，用屁股跟權力象徵建築物或歷史遺跡面對面Say Hello，以行為掌上壓（國內叫俯卧撐）留影。
人人回應不一，西方人愛之，讚譽行為藝術，奉為行為藝術家。老區，佩服！
人一世物一世，至緊要活得坦蕩蕩。