由中國牽頭嘅亞投行今年1月正式成立，中國財政部前副部長金立群擔任首任行長，噚日佢首次以行長身份來港參加公開活動，連續兩日要出席三場講座與論壇，行程都幾匆忙。
金立群噚日朝早出席瑞信論壇嘅閉門環節，晚上就參與銀行公會卓越人士講座暨晚宴，宴會開始前，傳媒當然問佢香港到底有冇機會加入亞投行喇，事關現有57個成員國，香港係冇份嘅。
金立群處事十分老練，亦相當口密，只係以「哈哈哈」三聲就帶過，之後喺財經事務及庫務局局長陳家強陪同下進場。
金立群喺講座上提到，亞投行嘅目的係為改善亞洲發展中國家嘅基建，帶來更好生活質素，仲話亞投行同亞開行唔同，唔係伸手要錢，而係一齊投資。金立群今日下晝會出席一個亞投行活動。