夜馬原本唔係大摩杯茶，不過這晚跑泥地，一向慣於沙田贏馬嘅大摩，當然唔錯過主場攞威之機。
第三場一班泥地1200米，大摩順利以2.2倍大熱「飛龍駒」建功，鞍上人田泰安連同頭場為時廐「至叻熊」開齋在內火速起孖，「飛龍駒」組合獨贏屬A1隔夜熱門，並派15.5元。
今場有「軍歌」同「旅遊大哥」退出，得番七駒比賽，開閘冇耐今季兩戰全入Q的「真先生」更疑似跛腳拉停，實際只得六駒參與競逐。當中「飛龍駒」沿途守內欄，咬住前領馬「崇山寶」跑，入正直路先越過後駒，再鬥贏內側的「包裝鬥士」，累積在泥地1200米四捷，馬主洪祖杭連同「佳龍駒」兩勝田草在內，旺氣逼人。
次熱門「包裝鬥士」出到雷神鍊盡都係第二，退出剛戰主席錦標捨難取易跑呢場，最終都敲響唔到今季勝鼓，三、四名由一對方廐冷馬「十二門徒」及「豪逸」瓜分，四重彩派3,726元。
大摩身處澳洲出席馬匹拍賣會，但照贏「飛龍駒」，此駒成為練者今季第31場頭馬，截至此場暫升上練馬師榜第五位。馬主洪祖杭說：「『飛龍駒』泥地性能好，加上今場馬少場合，對手又沒有上仗般強，贏馬很合理。」