今朝起身用Whatsapp，相信唔少人都見到黃字通知。唔使擔心係呃人連結，其實係官方最新公佈的點對點加密技術提示。呢個加密技術有幾密？我哋就問過香港資訊科技商會榮譽會長方保僑，佢話今次Whatsapp用上AES 256bit加密技術，第三方要用數以億年的時間先破解到。主要針對類似FBI同Apple嘅解鎖糾紛，用家對話記錄連Whatsapp自己都查唔到，對話記錄冇喺雙方手機留底，政府、警察要搵都無符。
方保僑續稱加入加密技術最大原因是要和其他即時通訊軟件競爭，例如Telegram已一早有AES 256加密：「Telegram有啲功能Whatsapp無，相信Whatsapp會陸續追加更多新功能。例如發放對方閱讀後就刪除嘅私密訊息，或者對方截圖會有通知等等。」不過方保橋都提提大家，點對點保密只代表第三方不可由Whatsapp伺服器中追查訊息，假如對方截圖分享都仲係會搞出類似「等埋發叔」呢類洩密事件。
記者：司徒港燊
