近日有傳人民力量立法會議員陳偉業將退下火線，新界西一席將讓路畀社民連黃浩銘。陳偉業（大嚿）噚日同八方證實，佢正積極考慮於9月立法會選舉，同黃浩銘合組名單，阿銘排第一，佢會排第二。佢又話，會喺嚟緊星期日人民力量嘅義工大會上討論呢件事。
陳偉業由1991年開始做立法局議員，由港同盟、民主黨、社民連到𠵱家嘅人民力量，大嚿咁多年喺立法會選舉都冇輸過，阿銘能否繼承佢啲票？大嚿話，唔信繼承呢回事，最終決定權都係喺選民手中。唔做立法會議員會轉戰邊度？大嚿話，自己由17歲做到𠵱家，一路都未休息過，唔做議員之後，會先唞唞。