周日(10日)沙田二班1400米草地賽，吳定強馬房「銀豐神駒」來港兩年多約32個月，終於初次登場。
呢匹灰馬仔乃2013-14馬季最高插班評分自購馬(94分)，當時屬沈集成馬房，擺明買來港希望爭大賽。點知人算不如天算，因受腳患困擾一直缺陣，之後轉到高廐冇起色，最後轉去專醫傷患馬的吳定強馬房，期間一直不跑亦一分不減，周日仍是94分上陣。
「銀豐神駒」馬主余國賢的父親余潤興家族，出晒名肯花錢買貴馬，之前引入的阿聯酋打吡亞軍「霸王神駒」固然係貴馬，而「銀豐神駒」挾法國1600米一級賽莊柏德大賽亞軍之名來港，身價一定唔平，可惜因健康問題蹉跎歲月，但幕後冇選擇退役，本季健康漸穩定，季內共試過六次大閘，每次走勢多數不過不失，目前已六歲，久疏戰陣要跑番外地水準實在唔易。吳定強一早卜定羅理雅為此馬主轡，而騎者在今朝(4月6日)更獨操「銀豐神駒」，且看呢匹灰馬仔可否在強哥訓練下重獲新生。
至於同場葉廐「得盛」，近兩季都渡江出戰澳港盃，兩次都跑季軍，但今年葉楚航卻部署此馬留港作戰，可見決心，將配雷景勳，唔可以睇小。