最近三聯書店一本新書，叫做「紫禁城100」，作者趙廣超係北京故宮博物院研究專家，對北京故宮有深厚認識。梁文道大力推介，指此書唔止係介紹故宮建築咁簡單，而係盡量利用「人氣」，透過人的角度，將冷冰冰嘅歷史與文物與歷史人物結合，拒絕古肅板起面孔說教，令故宮紫禁城內的人物、建築、擺設、日常生活連接起嚟，將紫禁城的人性、趣味性全現於讀者眼前。
寫一本咁大部頭嘅書，非同小可，作者除咗要對題目有非一般認識之外，仲要有識見、膽量，將雜亂無比嘅歷史事件及建築物篩選，裁剪，精工細琢，先至可能完成一本三百餘頁厚嘅紫禁城故事圖冊，趙廣超與北京故宮文化研發小組、設計及文化研究工作室得到「何鴻毅家族基金」贊助，經費無憂，故此研究及寫作過程得以順利展開，完成後交由三聯出版，呢類書籍通常只會係圖書館收藏及成為豪宅大廳茶几上嘅書籍，好難有廣大銷路，三聯書店想話靠賣書賺錢，大概冇可能。不過，既然有何鴻毅家族基金慷慨贊助，又唔怕做多啲呢類書籍，廣傳後世吖。
何東爵士之長子嫡孫（第四代）何猷忠係何鴻毅家族基金主席，約三十年前，何先生初出道，在投資基金工作，一位朋友介紹佢同左丁山認識，有數面之緣，記得當年佢嘅公司有一位Lloyd George，係20世紀初英國偉大首相Lloyd George嘅後人，一啲朋友講及：「何東加Lloyd George後人，呢間公司可謂係最藍血嘅投資基金！」其實何東家族後人不注重賺錢，「何鴻毅家族基金」之成立宗旨就係贊助中台港三地之文化藝術活動，例如「紫禁城100」，還有香港管弦樂團駐團作曲家計劃，洛杉磯The Getty Center於2016年5月7日至9月4日舉辦之「敦煌石窟」中國絲綢之路的佛教藝術展，6月17日至9月18日之臺北國立故宮博物院精品展，8至11日之愛荷華大學國際寫作計劃（第八位香港作家赴美交流）等等，呢類文化藝術之「慈善工作」係純粹支出，只有源流久遠嘅大富尚禮人家才會有識見擔得起，「何鴻毅家族基金」當然係其中表表者。基金最近介紹營運總監俾傳媒認識，就係鍾妙芬博士，中大聯合書院經濟系畢業後，轉攻藝術史，師從中大高美慶教授，得中大碩士學位後到港大攻讀藝術史博士，之後往英美工作，回港前係美國俄亥俄州克里夫蘭博物館高管，既識藝術，又讀過經濟，鍾博士啱晒做文化工作嘅營運總監啦！