著名導演杜琪峯和韋家輝都是無綫出身，但昨日雙雙為ViuTV站台，現身會展出席啟播禮。主持人問怎樣才能做好電視節目？杜琪峯妙語連珠：「如果咁易講到，就唔會有電視台執笠啦！我哋離開電視台都超過20年，真係好大分別，最重要令觀眾有得揀，要有質量，拍得細緻，唔係求其愛嚟餸飯咁就死得嘞，希望畀創作人最大afford。」
問到怎樣的劇集才會受歡迎？韋家輝說：「以前我哋創作就大膽啲，喺電視台拍劇都會有罰錢情況，不過呢十幾年冇咁嘅事，好似靜咗好多咁。」杜Sir在旁笑笑口說：「我哋兩個合稱TVB生番，喺呢啲咁嘅電視台出嚟，後來覺得電視台唔好玩就去咗做電影，又變電影生番。我鼓勵ViuTV畀多啲機會下一代小朋友同年輕人。」
採訪：盧妹、馬建華
攝影：陳順禎