受惠油價勁跌嘅國泰航空（293），去年多賺超過90%，一班管理層嘅加薪幅度、以至全年花紅都相當禾味。其中，行政總裁（CEO）朱國樑花紅大增六成，全年袋成千萬糧；而常務總裁（COO）何杲（Rupert Hogg）就成為國泰最「搵得」管理層，全年人工達1,111萬元。
國泰最新年報顯示，計算入基本薪金、花紅、津貼福利同其他退休供款等，CEO朱國樑舊年總薪金約1,000萬元，較2014年增加37%，雖然佢嘅基本薪金只加約5.7%，但花紅勁升61%至384萬元。
COO何杲舊年收入就有1,111萬元，當中包括房屋津貼434萬元，整體收入較2014年大增七成。何杲人工三級跳，主要因為佢2014年3月先升職做COO，而2015年首次袋成份180萬花紅。