即使有實力，有時候也需要等一個機會。 來自馬來西亞的李幸倪（Gin Lee），天生一副好聲音，2011年在香港出道，有過不少好歌，不過在2014年約滿舊唱片公司後消失了差不多一年，上年她趁這個「真空期」挑戰自己參加歌唱比賽，亦令更多人認識到她 。這把好聲音輾轉之下，今年終於回到香港，早前推出的首支主打歌《雙雙》，MV只是兩個月已經點擊過百萬，「我覺得好幸福，當我知道好多人期待我嘅新歌，嗰種被期待嘅感覺好正！」
統籌：林妙萍
撰文：陳蔚渝
造型：林嘉慈
攝影：郭賢興
化妝：Matt Li
髮型：Eve Chiu of Queen's Private i Salon
香港樂壇雖然經常被人形容為已死，亦有不少歌手選擇北上發展， 偏偏Gin Lee參加完歌唱比賽，人氣急升後，選擇繼續在香港唱好歌。
堅持音樂夢想
Gin Lee回港的首支主打歌《雙雙》大獲好評，為回來香港打下強心針，今年將會推出大碟《beGin》，「呢隻碟嘅參與度好高，每隻歌都同我息息相關，就算唔係我寫都會同監製、填詞人去傾我想要乜嘢題材，除咗音樂同態度，仲有我對生活、愛情嘅睇法。」
與上一間唱片公司完約之後，出現了一年時間的「真空期」，曾經令Gin Lee 感到前路茫茫，「有一段時間冇公司backup，嗰段時間好迷失，有諗過係唔係唔合適呢一行，好多質疑自己嘅聲音出現，最後都堅持落去，原因只有一個，因為我太愛音樂。」最後去了參加第四季《中國好聲音》，並成功加入了周杰倫隊，越唱越強最後獲得第九名 ，另外又參加了《中國之聲》，「其實每一年佢哋都有搵我，但當時自己做緊音樂又有出碟，所以身份尷尬，但去到上年有段真空期，其實我唔係特別鍾意比賽，我係一個鍾意自由自在表演嘅歌手，比賽會有好多限制，但係有時候要喺啱嘅時候要做啱嘅嘢，我覺得上年係一個時機。」Gin Lee在比賽唱出好成績，而且更人氣飆升，她覺得是一個非常好的磨練，「之前都是踢館形式one off，但上年嘅兩個比賽需要關關過，又要喺內地一段時間，係第一次去體驗，見識到好多，亦令我更加堅定，當經歷過好多不安，反而令我更加想做好音樂。」
勇氣來自父母
Gin Lee熱愛音樂，最大原因是深受父母影響，「由細到大，父母同家庭對我影響好大，我哋會成日喺屋企jam歌，屋企人都好支持我，佢哋會想我做歌手同做音樂，如果冇佢哋支持，我可能冇咁大勇氣去追求夢想。」小時候父母教她經典老歌，現在則每場重要比賽都現身支持，「我媽咪到𠵱家聽親我唱歌都仲會喊，佢會好感動，佢覺得個女咁辛苦堅持到𠵱家，終於可以喺台上發光喇。」
不過由於Gin Lee在香港發展，所以經常都要與父母分隔兩地，她笑言：「𠵱家多咗朋友，不過過時過節都會覺得好孤單。」
喜愛大自然
Gin Lee 除了喜歡唱歌，亦喜歡跳舞和演戲，而且更有去上堂，又時不時在Instagram與大家分享跳舞相，「跳舞同演戲係performance嘅一部份，跳舞係可以用身體語言表演自己，我去學演戲係因為每一首歌都係講緊一個故事，演緊一套戲，所有嘢都係可以強化我嘅演繹，喺台上嘅表演，之後可能大家有多啲機會見到我跳舞或者演戲。」工作以外，Gin Lee就喜歡親親大自然，「唔使做嘢嘅時候，我鍾意去行山，因為可以接觸大自然，又可以做運動，係一個2 in1嘅活動。」
更多精采時尚內容，盡在 http://add.appledaily.com 。