今個星期繼續由何西暫代牽牛。10年後球壇會係點？不如睇睇10年前又係咩環境先。
當今兩大球王基斯坦奴朗拿度（C朗）同美斯，喺2006年都仲未算係頂級球星，C朗仲未幫曼聯贏過英超冠軍；美斯喺05/06球季先開始有多啲機會代表巴塞一隊上陣。當時臨近06年世盃，決賽周前被視為奪標熱門嘅係巴西，冇嘅，當年森巴鋒線有朗拿度、朗拿甸奴、阿祖安奴同卡卡；點知去到八強就畀法國踢出局。事隔10年，巴西兜兜轉轉又再由鄧加領軍，表現更加差強人意，10年之後嘅巴西，隨時更加慘不忍睹。
巴西喺上個月兩場世盃外南美區比賽都和局失分，𠵱家喺10支球隊排第六，唔知係鄧加固執定真係冇人揀，前鋒線仲要靠35歲嘅奧利華拉。昔日巴西人才輩出，但𠵱家本土球會嘅青訓似乎麻麻哋，又或者係向錢看，稍為有啲表現就急於將啲小將賣去歐洲球會賺錢。睇番呢10年巴西鋒線曾被譽為前途無可限量嘅射手，阿祖安奴、羅賓奴同柏圖等等，幾乎全部都越踢越沉，𠵱家講嚟講去都係尼馬（中），冇咗佢就唔識贏波咁。最怕到咗2026年，巴西出戰世盃決賽周，仲要靠到時已經34歲嘅尼馬。始終以目前賽制，南美球隊要出線打入決賽周真係唔係太大難度，巴西衰到極應該都仲可以保住唯一參加過每屆世盃決賽周嘅金漆招牌，除咗可以食呢個老本自high一下，還有甚麼？
文：何西