咁啱今晚邊開着電視邊工作，估唔到見到最多嘅係銀行同財務公司的借錢廣告。每節都有，甚或加埋借錢網上平台或Apps中介公司嘅廣告，可以喺同一廣告時段見到兩個同借錢有關嘅廣告。銀行真係有咁多錢想借畀人？同時又有咁多人要借錢去找卡數、或找完卡數再去shopping掃貨？真係有咁「易借易還」？做廣告多年，一向心裏都唔想做啲鼓吹勁借錢去狂消費的宣傳。錢可以使，唔夠亦可以問人借，就算真係「貸款易到極」，但基本應自問個人嘅還款能力而量力而使、繼而量力而借。如此簡單嘅道理，唔使人教啦！
記得好細個嗰陣，爺爺教我做人道理：「第日大個，有朋友問你借錢，係好朋友嘅要幫忙，借得畀人，就要預咗冇得還。」長大了才明白，當中確實蘊含智慧。人家唱「承諾，值萬金」，借錢時當然信誓旦旦，一講到還錢，便逃之夭夭。
仲來個「卡數一筆清」。有時，借私人貸款去還長命卡數都未嘗不是一個唔錯嘅解決方法，至少唔使枕住捱咁高息。繼我話，最重要都係講求自己有冇好好計劃，真係一筆還一筆咁清。唔係呢頭借、嗰頭碌，唔爆卡都難，借到幾時才還得晒？有時，真係好怕睇到啲貸款廣告影住個女主角一邊告別厚厚的信用卡黃單，一邊攞住十幾個shopping bag ……正正就講明，好一個惡性循環，財務公司生意，長做長有。
十幾年前，喺某大廣告公司做，嗰陣個老闆係一個好巴閉嘅女人。佢仲出名縮骨，成日放工經過啲junior同事就好順口咁問：「有冇散紙？咁啱冇散紙搭的士？」啲同事怕老闆又唔敢推，通常都借一百幾十。結果？唔使問啦？當然一去冇回頭！有一次放工時分，呢位女Boss一直行出走廊，直到reception，一個同事都見唔到，佢就好自然咁問守夜更嘅「食Q」王伯，同一個問題，得到不一樣的回應。王伯：「我大把散紙喎，你要打散五百定一千蚊，我幫你唱吖？」無語。
王伯實屬高手，這個行內故事，一直流傳至今。
文廸晞
mailto:[email protected]