政府部門要走在時代「尖啄」，紛紛利用網上平台呃like宣傳，但唔係人人都識玩，呃like唔成好易出事。好似勞工及福利局去年底開咗個facebook，用咗34.1萬，至今大嗱嗱有成……253人like（圖），平均每個like要1,347蚊。
自己少人like都唔緊要，最怕人哋多like。八方睇過民政事務局同發展局，前者有逾2,100個like，後者仲超過6,750個㖭。但正所謂輸人就唔好輸陣，勞福局喺新財政年度預算用56.7萬投放喺facebook，大幅增加66%，急起直追。
雖然1個like成本不菲，但勞福局都未算係大花筒，去年度只外訪兩次共7人，仲計埋飛行碳足印，共排放約4公噸二氧化碳，比起前個年度大幅減少約30公噸，為政府慳錢之餘，都幫到地球減碳。