NCAA決賽係美國每年一度嘅體育盛事，「波神」米高佐敦（Michael Jordan）周一亦都有去決賽賽場，為母校北卡羅萊納大學（North Carolina）打氣；可惜北卡最終俾維蘭路華大學（Villanova）以77:74絕殺，搞到MJ勁失望！
維蘭路華入絕殺三分
今屆NCAA決賽戰況極緊湊，當北卡後衞比治（Marcus Paige）喺下半場最後六秒，幾乎失晒平衡嘅情況之下射入三分波，將比數扳平至74:74嗰陣，所有人都覺得比賽將會進入加時，就連MJ都忍唔住企起身振臂歡呼，為母校打氣。可惜維蘭路華前鋒贊堅斯（Kris Jenkins）喺最後一秒射入三分波，幫球隊以77:74絕殺北卡，贏得隊史第二冠。據《ESPN》報道，贊堅斯呢個三分波，係繼1983年北卡州立大學嘅查理斯（Lorenzo Charles）入樽後，首個為球隊贏得NCAA總冠軍嘅絕殺球。
目睹母校輸波，MJ梗係冇癮啦，不過賽後佢都有走入更衣室安慰班師弟，話一班師弟今場嘅好表現，令佢為北卡校友嘅身份而自豪；至於攻入全場最高21分嘅比治透露：「MJ話挫折可以成為我哋嘅動力、職業生涯中寶貴嘅經驗，從而令我哋學識點去爭勝。」