周三(6日)沙田夜戰編全泥地賽事，屬今季第二次，睇番之前一次係季初去年11月18日，當晚容天鵬三駒配洋將上陣，憑「老友記」及「安闖」取得一勝一位。今期容廐出馬四匹，其中「盈利駿馬」及「安闖」均強配潘頓，人馬以往合作跑泥地均有佳績支持，料可替馬房增添進賬。
第六場二班1200米泥地之「盈利駿馬」，曾六次角逐此程，取得兩勝兩亞一季一第五未失獎金，當中兩次由潘頓經手更獲一冠一亞全入Q，可見人馬特別合拍。上仗跑從未上名之草地賽，大敗不能作準，今仗打王牌重返強項，並立即回配潘頓壓陣，睇部署已顯示出擊決心。
至於第五場四班1800米泥地之「安闖」，今季五次跑泥地賽，交出兩亞兩季一第五，演出極之準繩，當中兩次正是由潘頓經手，人馬合作早有默契，難得上仗入位後並無加分，60分馬剛好可留在四班上陣，對爭取在港首捷應有幫助。