舊年被沽空機構狙擊而聞名嘅中國天然氣（931），原來有個懵豬董事。公司執董李繼賢舊年初竟然喺業績禁售期間，分別喺3月9、10、11號連續三日喺市場上買入公司80萬股，最終搞到要虧本出貨。
根據規定，上市公司董事唔可以喺公佈業績前兩個月買賣公司股份。李繼賢雖然由2007年10月已經做執董，但竟然咁大意。睇番舊年3月9至11日，公司收市價由0.294元、0.284元，回落至0.278元，公司通告話，李繼賢連買三日後，喺最後一日發現出錯，即刻喺11號賠本沽晒80萬股。
查實呢間公司另一執董李淑嫻，亦早於2014年曾經冇通知公司沽售100萬股，睇嚟中國天然氣都要多啲同董事溝通吓喇。