昨日講到香港可能成為「亞洲藝術之都」，為避免誤會，必須講明，係亞洲藝術品買賣之都，香港人最叻做買賣，在藝術創作方面，比起杭州、上海、東京、京都等地，可能稍遜一籌。但西方藝術界早已知道，藝術家若無畫廊、博物館，收藏家、藝術品代理人、拍賣行、保險公司等等各方面互相合作，藝術家只不過係一位窮秀才，生前兩餐堪虞，死後即使名滿藝林，係幾搵藝術家笨㗎。古老說話有句：文窮而後工。呸，正宗阿Q啫，文人發達唔得嘅咩，唔講哈利波特咁巴閉，日本司馬遼太郎寫書都唔知搵幾多錢，美國更加大把小說名家係富翁級數，靠腦袋，靠文采，靠創意搵食之人如果自鳴清高，受苦嘅係自己，得益嘅係他人。以此視之，Art Basel、Art Central之類辦得越多，越熱鬧就越好。
這回香港成為亞洲藝術品之都，最適合內地富豪土豪來港掃貨。蘋果日報於4月1日報道內地富豪收藏家劉益謙來港參加拍賣行佳士得嘅預展，對莫奈之「睡蓮池塘」觀賞良久，可能出手競投，估值高達2.73億港元，如果賣得出，佳仕得收佣金收到手軟。
在陸羽午茶，古董收藏家醫生C話4月4日開始嘅一個星期，香港起碼有五六個拍賣會（據佢所知），大概有佳士得、保利、蘇富比，小型嘅有天行健等等，藝術品行業十分熱鬧，希望能吸一啲極高檔遊客來港過夜，令本地酒店業唔使喊咁口。不過醫生C話適逢中國經濟增長放緩，又有打貪腐雷厲風行，或會影響拍賣氣氛，未必個個拍賣會都有好成績。
電台小花K來電告知，唔使去佳士得預展都可以睇到莫奈作品嘅，佢平時花幾多時間學畫畫及參觀畫展，知道法國領事館之法國五月活動（Le French May）會有莫奈精品展，（5月4日至7月11日，香港文化博物館），中文名稱就係「他鄉情韻：克勞德．莫奈作品展」。畫展在沙田舉行，小花K特別叫左丁山去參觀。莫奈大名鼎鼎，係人都識，但係如何欣賞佢嘅作品，左丁山未入流，小花K話：「唔怕，有專題講座，你留意吓一個陳偉邦講座就得嘞。」跟住佢傳來段消息，唉，乜咁遲先至講㗎，應該提早到五月中吖嘛，就係7月2日香港藝術學院高級講師陳偉邦在文化博物館講如何欣賞領悟莫奈作品及其繪畫技術，大家留意嘞。