近年中港經濟增長放慢，「超人」李嘉誠都話香港經濟廿年來最差，主力做中港物業市場嘅嘉里建設（683）亦向幾位高層開刀減花紅，主席兼首席執行官黃小抗、總裁何述勤、執董錢少華齊齊減薪。
根據嘉里最新年報，公司落刀都幾狠，執董錢少華嘅花紅減得最多，由2014年1,900萬元，減咗21%，得番1,500萬，唔知同佢冇兼任聯席董事總經理有冇關係呢？
至於主席兼首席執行官黃小抗同總裁何述勤，原本花紅分別有2,200萬元同2,000萬元，今年就分別得番1,850萬元同1,700萬元，雙雙減15%。
雖然減花紅好傷，但睇番嘉里舊年條數，純利減少18%，營業額都跌29%，高層都好應該同公司共度時艱，何況三位高層嘅總年薪，計埋都超過2,000萬元，減極都係面嗰層喇。