羅嘉良早年北上搵人仔，近日為拍無綫新劇留港兩個半月。曾經話拍劇會出動私伙靚衫嘅佢，之前趁有空檔就同老婆蘇岩到銅鑼灣I.t shopping，大手狂掃春裝，短短兩個鐘就買咗四大袋戰利品。
當日喺店舖內，羅嘉良主力試衫，老婆則喺旁邊提供意見，只見羅嘉良專攻白色恤衫、T恤同白短褲，其中幾件恤衫仲有透視效果，姣中帶潮味。當佢換上新衫喺試身室出嚟嘅時候，即場喺老婆面前左擰右擰行貓步，又用普通話問：「好不好看？」試到中段，羅嘉良煙癮發作，撇低老婆喺門外食煙，之後再返回店內。
第二輪揀鞋
「提神」後，羅嘉良第二輪血拼開始，今次佢就專揀皮靴，呢個時候老婆已經頂唔順開始頻頻「放蚊」，又拎自備暖壺自斟自飲，飲完主動遞畀老公，十分貼心。經過一輪狂風掃落葉式shopping後，衫褲鞋襪掃咗整整四袋，臨走時，羅嘉良要勞煩店內職員幫手將戰利品放到車尾箱，跟住同老婆到附近食街醫肚。
撰文：馮仁昭