咪睇民主黨主席劉慧卿喺立法會提出質詢監察政府時，好似聲大夾惡咁，查實，佢都有溫柔嘅一面㗎，八方仲親眼見到㖭！立法會特別財委會噚日審議有關財經事務及公共財政嘅範疇時，財經事務及庫務局常任秘書長（財經事務）黃灝玄都在席。而黃灝玄早排好黑仔，佢位於深灣道嘅獨立屋宿舍遭爆竊，失去一個夾萬，但當時佢外遊中，本人安全無事。唔知卿姐係咪見到黃灝玄逃過一劫，都戥佢高興，開會時見到黃灝玄後即刻上前輕撫對方……隻手，相信都係慰問對方一番，只見黃灝玄笑到見牙唔見眼，睇嚟都對卿姐溫柔對待好鬼受落咯！