港交所（388）行政總裁李小加出身投行，一向喜歡做刁，噚日講到一單刁竟然改口風話「通常會失敗！」點解嘅？
話說小加出席瑞信論壇，有人問佢對於芝加哥證券交易所，早前接受中資財團重慶財信集團收購，有乜睇法，佢回應話，芝加哥證交所「名字大，但實際規模很小」，而且每個地方有自己交易所，對當地市民同企業關係比較密切，所以交易所併購，通常都會失敗。佢仲預期，亞太區交易所短期內唔會有併購㖭。
根據資料顯示，1月份芝加哥證交所交易量只佔全美國0.5%，規模全美倒數第三。大雞唔食細米，唔怪得小加睇唔上眼喇。
反而德意志交易所、倫敦證券交易所謀求合併，小加就話會睇到實。鬼咩，如果合併成功，佢地嘅市值即刻爬港交所頭。