平治車手咸姆頓喺新賽季出師不利，頭兩站都輸畀隊友羅斯保，而佢喺巴林站賽後，即刻同歌手Jess Glynne開P玩通宵，仲喺社交網站上載自己嘆水煙嘅相，唔通佢「借煙澆愁」？平治主席禾夫周一透露，咸仔戰績唔好嘅主因唔係技術差，而係戰車嘅機件出現問題。禾夫仲話平治喺呢個月17日上海站之前，問題應該都未解決到，令咸仔嘅衞冕之路出現危機。