由宋慧喬、宋仲基主演嘅人氣劇《太陽的後裔》近期hit爆，相當受劇迷歡迎。不過劇迷除咗睇劇之餘，都發現咗套劇有唔少穿崩位，你又有冇留意到？
1.舉玩具槍捉小偷（第1集）
劉時鎮（宋仲基飾）同徐大英（陳久飾）放假喺街上遇到想逃走嘅小偷時，兩人原先好有型咁舉住玩具槍瞄準小偷，但下一個遠鏡就見到兩人仲未有任何動作，再下一個鏡頭又變返瞄準姿勢。
2.字跡唔同（第1集）
喺捉到小偷之後，劉時鎮喺對方手上寫低佢嘅受傷情況，事後小偷被送到醫院由姜暮煙（宋慧喬飾）接手救治，但對比下，姜暮煙見到嘅字跡同劉時鎮寫嘅明顯唔同。
3.銀包開口（第1集）
劉時鎮同徐大英喺醫院外面救畀黑幫圍攻嘅小偷時，徐大英拎住銀包向黑幫挑釁，當時銀包嘅開口喺向外面，但後尾打交時銀包開口就變咗向手心。
4.約會補妝（第1集）
劉時鎮約姜暮煙喺醫院見面，姜暮煙喺電梯入面補妝，不過佢個化妝品個蓋係冇打開到。而女士們應該都知道，BB Cushion個粉撲同Cushion中間有個蓋隔住，要打開先用到。
5.劉時鎮X光片（第2集）
劉時鎮被派兵到海外執行任務，姜暮煙因為掛住佢就望住劉時鎮張X光片，有劇迷就指出張X光片係調轉咗，不過就有醫生就推測可能係劇組刻意安排劉時鎮有「器官反轉症」，為之後嘅劇情做反轉。
6.倒地攬女（第3集）
劉時鎮同姜暮煙喺烏魯克重逢，不過氣氛尷尬，劉時鎮用地雷開玩笑緩和氣氛，但就雙雙倒地。當時劉時鎮將自己右手墊喺頭下，但下一個遠鏡就見到佢雙手攬住姜暮煙，再下一個近鏡劉時鎮隻右手又喺個頭下面。
7.手機失蹤（第5集）
姜暮煙揸車發生意外，架車卡喺懸崖邊就嚟要跌落海時，佢拎出手機錄低「遺言」，原本手中拎住嘅手機下一個鏡頭就消失咗。
8.人工呼吸（第5集）
劉時鎮幫姜暮煙做人工呼吸時，冇捏住對方個鼻，而心外壓時位置又太高。
9.「危險勿進」木板（第9集）
劉時鎮同姜暮煙誤闖地雷區，一步一步慢慢行返出嚟之後，劉時鎮問姜暮煙借唇膏喺木板上面寫住「危險勿進」嘅字眼。上一秒木板長嗰邊仲喺右邊，下一個鏡頭就喺左邊。