馬季過咗三份之二，過埋今個月24日女皇盃同下月1日冠軍一哩賽，晨課便會有濃厚「收操」味道，田泰安喺女皇盃將會騎苗廄「馬上發財」，冠軍一哩賽就暫時未卜到座騎。「馬上發財」從未贏過田草，爭女皇盃難度極大，但安仔話非常重視上述兩個大賽日，因為今個暑假佢終於可到日本客串。
安仔前季已計劃到東瀛客串，但他太大意，唔記得護照到期而告吹，上季就因季尾騎「勇戰」墮馬受傷取消赴日本。英文俚語有句「third time lucky」，即做一件事嘗試到第三次，就會有幸運之神眷顧。對於今年日本之行，田泰安話：「我暫時未定去日本邊個城市客串，自己一直想見識日本賽馬文化，希望一切順利啦！」
安仔前季女皇盃騎過日本代表「再自由」落第，佢亦認識本屆香港一哩錦標盟主「滿樂時」練馬師堀宣行，「滿樂時」即將出戰冠軍一哩賽；而女皇盃日本將派「朗日清天」、「新紀錄」同「里見皇冠」強陣征港，安仔話屆時會趁機主動出擊，向一眾日本練馬師、馬主自我介紹多多交流，建立人際網絡，對暑假日本客串爭取座騎肯定有幫助。
周三晚(6日)賽事方面，田泰安第三場一班1200米隻「飛龍駒」9戰同程獲3冠2亞2季，係呢場唯一贏過同程嘅賽駒，安仔話「飛龍駒」抽到3檔非常好跑，預期「崇山寶」會快放，應會跟喺佢後面，有信心交出好成績。