一提考牌，唔少人或者擰晒頭，最怕係「肥佬」，八方卻發現，公民黨有個「考牌王」，無論上天落地或下海，考牌全部一take過。係邊個？咪係公民黨飛機師譚文豪（Jeremy）囉！Jeremy嘅飛機師形像深入民心，但唔講大家未必知，佢同時係鐵騎士，日前佢同市民一齊抗議領展車場年年加租時，就以《烈火戰車》嘅「豪Dee」電單車look登場。
愛揸電單車懷緬亡父
八方問過Jeremy，佢話愛揸電單車係受的士司機爸爸影響，因爸爸係電單車發燒友，曾經喺珠海參加過唔少比賽，自己喺媽媽肚裏面時，已感受過爸爸嘅速度。𠵱家佢擁有嘅兩部電單車Yamaha R6及Yamaha TZR250都係爸爸留低，強調「一世都唔會賣」。佢話家陣揸電單車主要係懷緬已過身嘅爸爸，始終受過胎教，笑言並唔係追求風馳電掣。
飛完天落番地，原來Jeremy仲識下海，連船隻輪機知識試都過咗關，攞到俗稱嘅「大偈牌」。佢透露喺澳洲大學畢業後第一次份工，就係喺生產快艇引擎嘅公司，出海測試引擎品質，有一年幾時間，拍住有船主牌嘅拍檔出海。佢仲話過去考咁多個牌，全部一take過，連澳洲嘅教車師傅當時都話，未試過有學生可以「零錯誤」下通過考牌。
雖則海、陸、空瓣瓣掂，但Jeremy最鍾意都係揸飛機，因為最有挑戰性！見佢近年將大部份專注力放喺九龍東，相信佢家陣最想攞嘅牌，莫過於九東選民喺9月立法會選舉用選票畀佢pass，以便晉身新一屆立法會咯。
李八方
mailto:[email protected]