【本報訊】香港電影金像獎董事局由13個本港專業電影協會組成，向董事局施壓的香港電影商協會也是董事局成員之一，由資深導演陳嘉上代表，並擔任副主席。董事局每月召開常務會議，解決會內決策性問題。
香港電影製作行政人員協會代表、金像獎董事局董事田啟文（田雞）昨日回應說：「講真，我個人唔認同《十年》係最佳電影，覺得好多同業可能係為拗氣而投票畀呢部戲，不過點都好，我會尊重賽果。」
他續指：「其實每年完咗頒獎禮，董事會都會開一次檢討大會，我哋係透明度好高嘅，如果老闆們覺得機制有檢討空間，咁佢哋都有代表喺董事局，咁到時佢哋可以提出討論，金像獎有一個叫評選事務小組，機制有乜要改善會交由呢個小組先討論，然後再交畀董事局去傾，如果大家同意改，咁下一年就會作出更改，但今年嘅賽果會照舊，唔會作出任何更改。」
代表演藝人協會進入董事局的任達華，對於《十年》的爭議回覆指：「我冇睇《十年》，近日要離港工作，冇時間睇住。我唔清楚電影商協會要重新訂機制呢個消息，冇聽過，但每個協會訂新機制係要重新開董事會。」
■記者陳月媚