【男潮籽】鍾意夠偏門　工廈砌鞋牆　兄弟儲500對Dunk SB

【男潮籽：玩物達人】
現在說起潮鞋，十之八九會答AJ、NMD、Ultra Boost，試問誰會提起Nike Dunk Low Pro SB（簡稱Dunk SB ）？偏門，只因人氣大不如前，但它憑藉多變的色彩及物料，配合不同概念，曾在潮流界盛極一時，如今美國、台灣等地仍有不少粉絲。張宇然（阿然）和張錦然（Simon）兩兄弟則始終如一，最近更租了一個二百來呎的工廈單位，用來擺放約500對心愛Dunk SB，並把特別訂做的透明鞋盒砌成一幅「鞋牆」，認真儲得霸氣。

說起儲鞋，很多男生也有這個喜好，少則十幾廿對，多則數十數百對也視作等閒，還得租用迷你倉來擺放心愛靚鞋，阿然及Simon兩兄弟則更進一步，「之前都係租迷你倉，但多年嚟越買越多，加上啲鞋全部放喺不見天日嘅迷你倉入面，連想拎出嚟睇吓都有難度，儲得冇乜意思，就搬到呢度。」「呢度」就是觀塘某幢工廈的小單位，約有二百多呎，雖然地方不大，也比迷你倉闊落得多，足夠他們以特別訂做的透明鞋盒來建一幅「鞋牆」，方便展示珍藏，「租金比迷你倉貴啲，但自由度高，地板同水松木櫃門都係我哋自己整，我喺仲有一部投影機，得閒約朋友上嚟傾下『鞋經』，睇吓比賽同電影，幾正！」二人說得不亦樂乎。

兩兄弟最近租了一個工廈單位，足夠他們用訂做的透明鞋盒，建一幅「鞋牆」，向同好朋友們展示珍藏。

說回Dunk SB，現在未必人人認得，但在2002年時，它在潮界可謂無人不識，儘管記者如今對它完全「冇feel」，但是仔細回想，當年也曾買過一對。至於喜歡Dunk SB的原因，兩兄弟原來各有取向，阿然說：「實不相瞞，我細個鍾意籃球，最鍾意嘅始終係AJ系列，但近年復刻得太誇張，由之前幾年一次，到𠵱家差唔多每個月、每個星期都有，唔只令我覺得唔值得收藏，就連上一次復刻，甚至原版嘅都因為復刻得太多而變得冇以前咁珍貴。」相反，Dunk SB的可愛之處是，很多款式也是真．限量版，不少更是全球只得幾百甚至幾十對、而且極少復刻，可一不可再（當然可以炒價入手）。「咁先係真正嘅限量版，而唔係𠵱家嘅『特別版』，實質只係做咗唔知幾多對嘅所謂『特別色』版本，所以Dunk SB喺我眼中更加有收藏價值同樂趣。」
「Dunk SB最吸引我嘅係，佢喺完全一樣嘅鞋款鞋形上面，靠唔同範疇嘅元素，例如音樂、國家、電影、專業板仔同跨界別嘅品牌等，加喺對鞋度，發展出無限可能。」Simon如是說。當年，Dunk SB正是以大膽配色及物料風靡一時，例如初代“Forbes”大玩泥色加麂皮，“SUPREME”用上AJ III的裂紋皮及“Reese Forbes Denim”用上正反兩面的牛仔布等。「我好鍾意五顏六色同奇怪物料，當年着出街吸引到好多目光。另外，Dunk SB最得意嘅係，會注入一啲意想不到嘅概念，例如好多人都知嘅“Heineken”喜力色，或都係“Diamond”嘅Tiffany色，完全九唔搭八嘅元素，但加咗喺一對板鞋上面。」著名例子還有“Freddy Krueger”，以電影《猛鬼街》的Freddy作靈感，除了經典橫間，更有血漬及爛肉，以及象徵殺人利爪的銀色剔，概念有趣細節豐富，可惜未得電影授權，結果胎死腹中，沒有正式推出，只有小量sample流出成為收藏珍品。

二人珍藏眾多，大多神級作品幾乎都有不止一對，以為他們早已盡收天下兵器？原來還有一對無法擁有的“Dream Shoes”，「“Dunk SB eBay”係2007年喺eBay上面做慈善拍賣嘅一對鞋，鍾意佢嘅原因除咗係五顏六色，仲有佢嘅傳奇性，佢以3萬美元成交之後，其中一隻俾人切成四份，而Nike亦承諾只做一對，所以真正有錢都買唔到！」Simon解釋。為了一圓夢想，阿然早前發現Air Force 1提供客製iD服務，於是忽發奇想，打算以Dunk SB eBay的配色來做一對「假Dunk SB eBay」，阿然說：「可惜NikeiD未有提供漆皮，得意嘅係起初我哋喺鞋身上面加“EBAY”字樣，結果俾Nike拒絕，結果我哋諗到將EBAY變成“EB@Y”，又俾我哋過到骨。」後來，他們專程把鞋運到台灣，找專家改成Dunk SB的模樣，兩兄弟自言跟原版有八成似，「算係圓咗一個夢想啦！」

兩兄弟以NikeiD服務及台灣改鞋專家完成這對「偽 Dunk SB eBay」，一圓夢想。

Dunk SB eBay只此一對，最終以3萬美元成交後，其中一隻被分屍。

【破格之作】Heineken
這對「喜力」不少潮人都會認識甚至擁有，2003年限量推出4,000對，但阿然兩兄弟已買了6對，現在炒價近$9,000。

【最強聯乘】SUPREME
與最強潮牌SUPREME聯乘，加入AJ III的裂紋皮，限量500對，現在炒價近$19,000。

【熱炒款式】Diamond（Tiffany）
較多人認識的名字是Tiffany，用上品牌的湖水藍綠色，加上限量4,000對，當年熱炒，上年推出高筒版仍深受潮人歡迎，現在炒價近$23,000。

【猛鬼亂入】Freddy Krueger
以《猛鬼街》的Freddy作靈感，但因未有正式授權而胎死腹中，最後流出小量sample，相當珍貴，現在炒價近$31,000。

Forbes
4對初代Dunk SB之一，限量4,000對，mono泥色加麂皮是最多人喜歡的一對。

Reese Forbes Denim
2002年推出，只有444對，由正反兩面的牛仔布製作。

Chocolate
2002年推出256對，是為了紀念著名滑板手Keenan Milton而特別製作。

Green Hemp
質地像麻布般，又特別用上生膠中底，限量420對。

Bison
2003年推出，沒有表明限定數目，因以麂皮配搭特別的橙紅色鞋頭，當年極受追捧，是甚少曾復刻的款式之一。

雖然Dunk SB在港屬於小眾玩意，但在美國依然風頭強勁，炒價持續高企，打開eBay，過萬元的也大有鞋在，「車同電子產品一用就跌價，但鞋就係睇住佢升值，加上係自己鍾意嘅嘢，多買都冇壞。」兩兄弟齊聲笑說。平常買鞋，一對是正常，兩對（一對着一對儲）已是鞋癡，兩兄弟卻揚言：「見一對買一對！」部份鞋款更有半打，認真誇張，「都係嗰一句，限量嘅Dunk SB，少一對就少一對，所以見到啱價錢嘅，即使有都會照買。」

隨便也能在eBay找到不少高價Dunk SB，像圖中灰色那對NYC Pigeon，炒價便達$46,524。

提到兄弟二人要把Air Force 1改成Dunk SB，其實不少人都覺得兩者很相似，當初Dunk SB亦是於Air Force 1的基礎上加入不同細節而變成適合踩板的專業板鞋，兩者不同之處大致如下：

Dunk SB（右）的鞋舌及足踝也特別加厚，增加保護性，鞋形亦較圓潤扁平。

Dunk SB在鞋墊上加入zoom air，增加踩板時所需要的緩震能力。

踩板時，一般鞋帶較易斷，Dunk SB便把鞋帶加粗，提升耐用度。

【男潮籽】鍾意夠偏門 工廈砌鞋牆 兄弟儲500對Dunk SB

【男潮籽】鍾意夠偏門　工廈砌鞋牆　兄弟儲500對Dunk SB