7-Eleven會同「港女花花煲」Le Creuset crossover推出一套十款的小「鍋」心餐具，喺4月6日就有得換喇！3月尾換購消息一出，官方照隨即係各路網站洗版，被瘋傳。好心急呢！我哋飲食籽仲率先喺今日拎到一套LC小「鍋」心餐具，連埋限量嘅湖水藍廚櫃，俾大家過目一下頂住癮先。
話明係「迷你」，成套餐具非常的骰，每款有一個同色LC迷你鍋及一款不銹鋼餐具或筷子，一套十色，大玩少女粉色系兼且有sharp爆橙色等。個煲雖然用矽膠做，但都算硬淨，不過個蓋千祈千祈唔好向上揭，因為個機關係畀你左右擰嘅。
換購方法一如以往，先買滿$20即有一個印花，$30兩個，$40三個，如此類推，但想換得齊十款就好睇彩數，皆因要儲齊18個印花先可以免費換，仲係隨機一款；又或者用7個印花加$22，不過都係random。簡單啲講，要換，最平方法就係先買$80嘢拎7個印花，再加$22，即係$102。
都係嗰句喇，女人買嘢係冇原因嘅！早兩日已經有人喺forum出post，「徵7-11 Le Creuset印花，4個每$10（編按：應為「4個$10」），40個印花出$100，需要包郵。無限要」，換句話說即係每個印花$2.5。不過，究竟呢套餐具係咪「有價有市」，都要過多幾日先知，但相信又會掀起新一股搶購潮，各位巴打絲打，加油喇！
印花派發日期︰4月6日至6月14日
換購日期：4月6日至6月21日（全線7-Eleven）
記者︰黃依情、黃子卓
攝影：鄧鴻欣
