三歲定八十？林作可以話畀你聽，唔係，雖然佢只得26歲！向來鬼馬口水多過茶嘅林作，如此形容自己小時候：「冇嘢講、自閉、愛獨處、鍾意同玩具多過同人接觸。」細個咁孤僻，係咪因為係獨生子？「但我超開心喎，可以自己一個人。」聲言好like私人空間，唔係奀皮仔喎。
話晒英國牛津數學系畢業，讀書一定搏命啩？佢自爆讀書一直冇乜野心，只求做個「負責任嘅學生」，即係……「即係有功課就實做好，但唔會再睇多啲書……唔多chur嗰隻。」
喺英國名牌公校哈羅讀中學嘅佢話，直至16、17歲，先開始鍾意熱鬧，「可能睇化咗啩，覺得把口都講得吓嘢啩」。佢自稱好專一，講緊嘅係運動，由細到大愛踢波；相對大隻佬外國同學，身形較細粒嘅佢由於較靈活、跑得快，所以一直打前鋒。
咁「我的志願」係咪律師？又唔係喎，佢聲稱大學畢業後，幾乎搵唔到工，嗰時想搵投資銀行嘅工作，有位同學喺佢前路茫茫之際，一言驚醒：「你其實牙尖嘴利。」結果咪去咗倫敦法律學院讀書，返港後攞埋港大法學碩士，然後成為大狀囉。佢話自己嘅經驗可以反映，凡事唔係冇出路，錯過咗可以再嚟過，一定搵到自己起步點喎。