大家近期行街，無論銅鑼灣定係荃灣，應該都好容易發現吉舖，或者有食肆忽然結業。華華噚日行經中環皇后大道中又見到一間，獲米芝蓮一星嘅高級粵菜館波士廳上星期已拉閘，關門大吉。
翻查公司註冊處資料，波士廳董事係馬主鍾泰強，不過有傳聞話背後老闆係唐英年。而波士廳舊年7月過海去到九龍站環球貿易廣場（ICC）開業，開張當晚，唐唐的確有出現，令呢個傳聞似層層。
中環呢間波士廳2013年開業，餐廳位於地庫，約有4,000平方呎，路面門口唔起眼，平時只見一位侍應企喺門口櫃枱仔負責招呼，噚日得番度鐵閘。聞說，波士廳月租38萬元，業主要求加租，佢就索性唔做，業主𠵱家叫緊月租40萬元，以目前飲食零售業放緩嘅情況去睇，業主似乎唔肯面對現實，不過又或者佢錢多，根本唔急於放租呢。