【專題籽】大人時間播放　鬼鬼哋主持撐起兒童節目

【專題籽：胚芽故事】
TSA問題：「細個睇《430穿梭機》的A，東面嗰個B睇《閃電傳真機》大；坐喺B西面嘅C只係記得《放學ICU》的蔥蔥，問到底𠵱家無綫兒童節目叫乜名？」TSA問題係咁刁轉㗎（好似係）。大人固然答唔出，你以為小朋友實識答？朝八晚六返學補習做功課上興趣班無縫緊接，四點五十分坐喺屋企睇電視？咪玩啦！且看今天開台的ViuTV兒童節目《快樂童盟》又可唔可以憑講流利廣東話的外籍主持，加上在「大人時間」六點半播放，修補小朋友與電視的關係。

Sunny哥哥、黑白殭屍、烏卒卒、麥偵探、芝士學堂老鼠、認字特警、蔥蔥，揀一個鍾意嘅，立即暴露年齡。那些年冇咁易輸在起跑線，放學搏老命做功課，就係為咗開電視的神聖一刻。細個小學雞時，為的真是兒童節目的不同環節，裏頭角色可以記到𠵱家，看着主持扮演動物以至食物，真的能投入其中，對他們的真實名字及角色都很了解。節目中間播放的卡通片固然也是重點，但不能否認，很多主持即使回想起來仍很有親切感。到較高年級，扮大人的心理作祟，漸漸對那些「大哥哥大姐姐」嗤之以鼻，然後還以「我已經不看兒童節目」為榮，忘了守在電視前的儍癡癡。小時候在兩個電視台之間馬拉松式遊走，無綫的卡通好看，亞視的《機靈加油站》有歷險遊戲，小朋友要鬥快完成，看着已覺緊張，走到幾乎要親吻電視般近，𠵱家亞視連台都執埋，俱往矣。

功課多到唔瞓都做唔晒，無謂的評核試再夾擊，幾歲人仔真係頂到？睇兒童節目是上一代人的奢侈？（設計圖片）

現在細路隨時比banker更日理萬機，可是兒童節目的時間卻沒因應實際需要調節，兒童節目無兒童睇，香港真係好詭異。街訪一堆小學生，只有一個同學仔能喊出一個《Think Big天地》主持，其他全部連節目名都想不起。《快樂童盟》能否闖出新景象？如果播放時間延後至六點半，捧場細路依然冇乜，會唔會係教育制度把新一代陰乾了？
視野越闊越好，與其只向北望，不如望埋東南西！一個兒童節目，連國際關係學者沈旭暉都留意到，仲要喺facebook留言推介：「起用烏克蘭、俄羅斯、英國等的香港人擔任主持，在今時今日的氣氛極為破格，對培養新一代國際視野相當重要。」兒童節目離不開幾道板斧──短劇教知識、同小朋友玩遊戲、語文科學生活百科大包圍，《快樂童盟》一樣有呢啲框架，但十一個主持中有九個識講廣東話嘅鬼鬼哋主持，的確新鮮。他們當中有學生、模特兒、老師、調酒師、健身教練，有人字正腔圓有人講唔正但幾cute。我同呢班真．香港人傾過偈，硬係覺得有人幫佢哋配咗音咁，有趣！培養「國際視野」梗係細細個開始最好，節目會教授主持家鄉的風俗知識，唔會嘥咗班主持的特別背景，但佢哋同時又會教中文成語，幾搞鬼。

烏克蘭裔Victoria小時候因愛看兒童節目中間播放的日本卡通而學日語，曾留學日本。

巴基斯坦巴西混血兒Khani覺得香港小朋友好勝，想向他們灌輸「輸反而贏到好多嘢」的道理。

英國菲律賓混血模特兒Asha小時候喜歡看明珠台播放的《Art Attack》，學習非一般方法做勞作。

俄羅斯裔Ansheles小時候喜歡看俄羅斯搞笑兒童劇《Epaлaш》，劇集輕輕鬆鬆講小朋友在日常生活遇到的問題。

巴西裔Luci少女時代喜歡看巴西才藝表演節目《Programa Eliana》，愛跳舞的她也曾幻想可以上節目表演。

哥斯達黎加香港混血兒林男爵，愛看西班牙兒童節目《Topo Gigio》，主角是隻布偶老鼠，會唱歌把小知識授予小朋友。

兒童節目都有個通病，小朋友演出一係誇張作狀，一係機械式背稿，違和感達到ifc水平。即使成年主持也同樣刻意hyper，睇到人雞皮起咗收唔番！《快樂童盟》主持稱他們大部份環節都沒有講稿，強調真實感。主持Victoria說：「小朋友係畀即時反應，鼓勵佢哋諗嘢，有自己諗法，我哋都成日爆肚。」小學及中學都就讀香港學校的巴西及巴基斯坦混血兒Khani：「細個唔鍾意睇《閃電傳真機》，就係因為唔鍾意佢哋over-reacting。電話響會好誇咁講：『嘩，個電話響呀。』」主持Asha：「我發現啲小朋友好驚錯，好想所有嘢都一百分滿分。我哋做戲劇就係想佢哋放鬆，想佢哋做番個小朋友，玩遊戲時我同佢哋講我哋可以一齊樣衰，我哋唔係平日佢哋見到的『大人』。」
六點半一般來說已經係「大人時間」，不過新台就把通常五點左右播放的兒童節目，延至六點半才播出。主持Ansheles說：「六點前會播卡通，跟住小朋友可以同家長一齊睇六點的新聞報道，再睇兒童節目，等佢哋睇埋新聞。」睇得出諗過度過。呢班主持有人土生土長，睇你我他耳熟能詳的兒童節目，也有人愛看家鄉節目，佢哋表現如何，真係拭目以待嘞。

Sunny哥哥（黃汝燊）是七十年代成長一群的大哥哥icon，他在《跳飛機》經常與小朋友大唱經典兒歌，當年的「怪獸」由嚴秋華扮演。

譚玉瑛當了兒童節目主持三十多年，多年來最深入民心的角色應是烏卒卒，手下是麥包扮演的矇查查。

魯文傑（左上）、伍文生（右上）、唐韋琪（左下）及蔡子健乃《閃電傳真機》及《至NET小人類》主持，演出當年「鼠洞」及「芝士學堂」環節，超經典。

《新飛虎隊》：1987-1989

《飛虎隊》：1989-1991

《出位放送組》：1991-1993

《德尊老師》：1993

《精靈校園》：1993

《機靈加油站》：1993-1996

《完全電腦手冊》：1996-1997

《精靈一族》：1997-1999

《亞洲電視兒童台》：2001-2007

講起經典兒童節目，不能不提BBC製作的幼兒節目《天使得得B》，難以形容的怪笑實在難以忘記。都市傳聞小朋友睇完會蠢、會呆，又有人撐它有齊黑白黃皮膚，再加上疑似是同性戀的Tinky Winky，好大愛平等喎！早前有報道更指恐怖組織伊斯蘭國（ISIS）成員會觀看《天使得得B》減壓，加劇《天使得得B》的傳奇。

七、八、九十以至千禧後觀眾看甚麼兒童節目？對哪些主持人有印象？對新電視台的播放安排、主持組合，又有沒有睇法？聽大家講兩句。