全國政協常委何柱國趁噚日兒童節，向前學民思潮召集人黃之鋒下戰書，約佢一齊落區數吉舖，令花生期貨價格急升。身兼星島新聞集團主席嘅何柱國，日前喺電視節目話佔中令本港經濟轉差，點名鬧之鋒以為大企業冇裁員係儍仔、白癡，又指通街都係吉舖，「咪就係炒咗人囉！」
之鋒就喺facebook反駁，話香港太過依賴自由行喇，加上店舖租金被拉高，先令好多小商戶捱唔到貴租要執笠，唔好乜嘢都賴晒佔中。之鋒仲話何柱國言論幼稚，係純情緒發洩嘅小學雞指罵。
何柱國事後承認係發洩情緒，但就唔認幼稚，更向之鋒挑機下戰書，叫佢一齊落區，去銅鑼灣、尖沙嘴廣東道等旺區數下𠵱家嘅吉舖數目，「如果佢（之鋒）係啱嘅，我同佢跪低叩3個響頭，我承認我係白癡」。不過，之鋒拒絕應戰，「不想政治討論娛樂化」。