劉健威老馬有火，在信報專欄（3月29日）批評胡恩威對Art Basel嘅睇法，左丁山有同感。推動藝術發展，千祈唔好一味高調，普通人邊度識得深入欣賞梵高莫奈作品吖，但若有展覽吸引大量學生、畫家、市民入場，即使佢地無法子買得起啲畫廊作品，行入去睇多幾次都係好事。
三月份係香港藝術之月，既有藝術節（音樂）帶來連場音樂會，又有本地藝術組織在中環海濱辦Art Central，壓軸好戲當然就係世界注目嘅Art Basel，今年因有宋慧喬、李安納度來港觀展，引起報紙娛樂版追訪，更加有廣泛宣傳。金融C太太在Art Basel第一晚預展就站在李安納度旁邊，佢又不知呢位「有型鬼佬」係邊位，冇要求合照，次日睇到蘋果娛樂版，先知道走咗雞，但最搥胸頓足嘅係佢位千金，投訴媽咪唔識影張相返嚟俾佢，情況就似二十幾年前在北京香格里拉酒店與黎明合照，攞張相送俾女兒，點知女兒跡近哭訴：「你做乜要企喺黎明身邊，我要佢嘅單人相呀！」
Art Central一位辦事人係畫廊女東主，呢位女士對左丁山講，近十年香港藝術行業發展得好快，畫廊數目大增，有兩個原因，一是內地人買書畫，出手之豪爽震動世界，故此歐洲藝壇湧來香港開業，第二就係本港富三代帶動藝術投資，例如新世界K11已見成果，最近又有李兆基外孫女（27歲）負責皇后大道中80號重建計劃，興建一座專為畫廊、畫展而設嘅大樓叫做H Queen's，因在中環黃金地段，影響力會超過K11。金錢、商業帶動自然係好緊要，但女東主就講：「最重要還是人氣，希望香港人多啲去行畫廊，行畫展，行Art Central與Art Basel等等，去得多，點都會沾上藝術思維，培養起對藝術嘅興趣！」左丁山問女東主：「近10年香港有一個全新行業興起，就係紅酒業，藝術業會唔會咁好景？」女東主答：「希望啦，西九愈快落成就愈好。目前主要藝術買家來自北京、上海，但中國稅重，稅例複雜，所以歐洲藝術公司全部來香港，令香港成為亞洲紅酒之都後，好快會成為藝術品之都，新加坡好想同香港搶，但因為香港條件更好，新加坡政府全力介入，都未能超越香港。」咁樣講，亦有隱憂嘅，就係中國反貪腐，增長放緩之下，Art Basel生意會差啲，會影響外國藝術品商人來港嘅意欲，不過每一個市場都有起有跌，最緊要係確立咗市場地位先！