恭喜晒，前輪后趙海珠（Alison）上星期六順利誕下細女，三歲幾嘅哥哥陳彥熹（Hayden）喺醫院見到妹妹時，似乎暫時未識得畀反應，不過Alison一早為大仔做好心理準備，哥哥遲吓應該可以幫手湊妹妹喇。
聽Alison講，佢陀呢一胎相對舒服，而且因為係陀女，荷爾蒙影響下，佢自己皮膚都幾靚，難怪佢過去呢一年，可以不時打扮得靚靚出席公開活動。佢呢一胎都係開刀，細女出世時約重6磅，暫時未改名。
其實Alison自2013年初生完仔之後，就冇做輪后，有一段短時間去過四叔旗下恒地（012）幫手，2014年開始專心湊仔，只係平日喺dbc數碼電台兼職做財經節目，得閒又做司儀、代言人等，𠵱家湊夠一個好字，真令人羨慕。