房東吸毒事件早已告一段落，房祖名、柯震東呢對患難兄弟經過休養生息後，最近又再重逢。日前兩兄弟加上陳柏霖，三劍俠重出江湖喺台北齊齊現身陳奕迅演唱會，不過第二晚祖名就帶咗幾位好友去到柯震東家所開嘅餐廳食晚飯，同行仲有數位打扮惹火嘅少女。
刻意前後腳
晚飯期間，祖名曾陪同朋友行出餐廳食煙，但旋即閃身返餐廳，之後就到柯震東一個人出餐廳外玩狗，又安排傭人帶狗去散步，自己再返店內繼續食飯，同祖名始終保持前後腳現身。隨後再有四名外籍朋友到場，個多小時之後，有位外籍朋友首先行出餐廳門口等車，其中一個外貌似混血兒嘅女子進出都戴住口罩，似乎刻意保持低調。與此同時，祖名同另一男子行出店外係咁望，一班朋友分批扮到唔識得咁離開，相當搞笑。
強調冇曖昧
事後祖名解釋，因有25位香港朋友去台灣睇陳奕迅演唱會，所以一盡地主之誼帶佢哋去吃飯。問祖名女友係咪在場？佢笑住話：「怎麼可能？有也不會出現在哪，那裏很多記者會拍。」佢又話當晚用手機幫外籍朋友叫Uber，但司機好耐都唔到，佢先行出橫街搵司機，絕對唔係探路睇係咪俾人偷拍，仲話一齊食飯嘅仲有岑建勳女兒岑寧兒、張艾嘉兒子Oscar等，純粹飯敍，冇曖昧關係。
撰文：陳以晴