每年都有好多片約嘅古天樂，連瞓覺時間都唔多夠，無時無刻都要為工作奔波，不過佢點都會抽時間同屋企人去旅行。早排古仔成為DBS iGO Rewards代言人，講起去旅行，佢話最鍾意周圍去搵食：「我覺得人生最緊要就係食，去旅行主要同屋企人去，首先會搵咗推介兼出名嘅食店，book定地方，其他就會去到沿途睇吓。」
「環遊世界太奢侈」
問古仔有冇夢想要環遊世界？佢話：「呢個太奢侈嘞，要用好多時間，加上我要take care屋企人，所以去一次旅行比拍戲仲辛苦，返到酒店郁都郁唔到。我𠵱家會選擇去多啲唔同地方，一個地方留長啲時間，了解當地風土民情，環遊世界只可以走馬看花，未必適合我。」
成日周圍飛去過好多唔同地方，古仔話最難忘係去阿布扎比同杜拜：「嗰度啲女性全部遮晒口面，有一日喺商場門口見到幾個女士等老公接，啲衫差唔多都認到，好神奇。」但更估不到係旅遊無數嘅古仔竟然零艷遇，佢話：「我全家人都行得好快，啲人唔會點見到我。」
撰文：馮仁昭