【本報訊】文憑試中文科今日開考，18連勝香港拳擊手曹星如亦正為其第19場「考試」、5月份的拳擊比賽備戰：「我當比賽係場考試，就算呢個比賽打完我輸咗，都唔代表輸咗場比賽就完晒所有嘢。」曹寄語考生放鬆心情，「最重要係去享受過程，唔係諗唔可以輸；因為太重視結果會影響表現，壓力，通常係自己畀自己」。
曾迷失無目標
自言「讀書好廢」的拳擊選手曹星如（Rex）表示：「我讀書時大部份時間都唔及格。」Rex稱當年試過「周圍搵學校、夜校讀」，又做過苦力、搬運工，年輕時「冇乜目標」，「開頭真係超迷失，過得一日得一日；真係好廢㗎」。
後來Rex找到自己的職業拳擊之路：「可以講自己以前無嘢叻嘅時候，真係冇乜人會認同我，但當喺拳擊比賽贏咗，或者只係盡咗力，其實就會有人認同；呢一份認同感令我可以繼續堅持落去！」Rex又表示背負18連勝有一定壓力，但會將壓力化作動力，「諗住唔輸得當然係種壓力，但又可以諗其實係好多人支持緊自己，更加要打好場比賽」。
面對「考試」，Rex稱不會感到害怕及擔憂，「只要準備好自己，確保最佳狀態，比賽當日我唔會擔心同緊張，反而係期待可以用到啲乜訓練成果」。
曹星如更寄語考生以平常心看待結果：「就算失敗你都可以攞番個經歷出來，佢會令你進步、唔再撞板。」
■記者葉偉東