曼聯隊長朗尼老婆高蓮前日30歲生日，高蓮亦旺埋老公隊波。曼聯周日喺英超主場對愛華頓，靠安東尼馬迪爾奠勝贏1:0，賽後以31戰得53分升上第五位，只係比四哥曼城少一分；領隊雲高爾亦「牙斬斬」，話佢哋唔單止會攞到下屆歐聯入場券，仲可以贏埋第三名㖭。
馬迪爾轟主場千球奠勝
曼聯主場奧脫福嘅南看台，前日正式改名做「卜比查爾頓爵士看台」，賽前夢劇院嘅球迷就用紅、白色紙牌砌出「SIR BOBBY」字樣，場面壯觀。講番場波，曼聯全場得兩次中框埋門，依然靠馬迪爾喺54分鐘一箭定江山，以1:0擊退愛華頓；而馬迪爾呢球，仲係曼聯喺英超主場第1,000個入波。紅魔贏波後以31戰得53分升上第五位，比四哥曼城同三哥阿仙奴分別少一分同五分；領隊雲高爾亦將目標放喺第三位：「呢場波我哋打得唔好，但好夠運。賽後我喺更衣室同球員講，最重要贏到愛華頓，否則之前贏曼城就等同白費心機。」
朗尼自誇有幾年貨仔
另外，養緊傷嘅朗尼前日冇份落場，着晒球隊西裝坐喺看台睇波。對於有球迷要求英格蘭主帥鶴臣，唔好選佢入國家隊踢今夏歐國盃決賽周，呢位三獅隊長咁樣回應：「我覺得自己仲有幾年貨仔。過去兩年我喺國家隊打得唔錯，仲入咗好多波。我打破一個有40年以上嘅紀錄（取代卜比查爾頓成為英格蘭隊史上入波最多球員），仲要係卜比爵士親自頒獎畀我，實在意義重大。」
至於朗尼老婆高蓮前日喺柴郡嘅美國餐廳Victor's in Hale搞生日派對，好多曼聯新舊球員嘅WAGs，包括卡域克老婆莉莎、基斯史摩寧女友曲姬、湯卡華利太太祖芝娜同費查太太凱莉等，早喺晏晝就到場；至於朗尼就要等曼聯比賽完，先同一齊睇波嘅英國唱作歌手James Bay嚟到。