【ViuTV開台】香港電視進入新紀元，免費電視頻道ViuTV明天開台，以「雙宋」宋仲基及宋慧喬主演的大熱韓劇《太陽的後裔》，以及「雙怡」林保怡和周家怡領軍的土產改編小說連續劇《瑪嘉烈與大衛系列 綠豆》響頭炮。《瑪》劇下周一晚上11時首播，之後逢星期一、二播映，以創新破格的題材和拍攝手法，加上福將「雙怡」合璧，必定為香港電視業重鋪一條新軌道。
撰文：楊潔雯
林保怡和周家怡置身香港電視業二次大戰中，為ViuTV披甲上陣，雙怡早前接受本報專訪時，林保怡說：「好似打緊仗，因為一個電視台要開台，40年先一個牌，我會覺得呢個係緣份之外，係開心嘅！我冇壓力，家怡，你有冇壓力？」周家怡說：「突然間開嗰陣時係有一下，尤其係我知道係開台劇！」雖然如此，雙怡仍然滿懷信心，保怡說：「本人好幸運地，每一個劇都嘭嘭聲，咁我哋兩個拼埋就真係冇得頂。」加怡附和：「本人近年來都係，都希望繼續落去。」
賣花要讚花香，保怡落力推薦全新感覺的破格電視劇《瑪》劇，他說：「我覺得係一個好有新意嘅嘢，畫面燈光擺位攝影，每一個shot都好花心思，唔係好似以前一個wide shot、冧膊、收工，係你會願意畀時間，拍得更加完美。可能花多兩三個鐘，我覺得係值。」
大膽唔理市場
《瑪》劇既不是傳統電視劇，又不像美劇，播映前一切都是想像之外，保怡說：「美劇好多嘢有，我哋冇，我哋冇飛車，我哋有揸的士，係我，好正常揸的士；我哋冇爆炸，但係我哋有鼻鼾聲；我哋唔會有陰謀，我哋冇電視劇應該有嘅元素，愛情、飛車、肉搏、笑料，我哋完全冇呢啲賺錢同攞收視嘅嘢，所以其實呢個係一個好大膽嘅做法。」保怡強調《瑪》劇「無聊」，全因內容都是兩個人生活最瑣碎的事，但必然會引起觀眾共鳴，家怡點頭認同他的看法：「ViuTV就係冇去理嗰個市場而拍啲商業嘢，而佢喺按小說，因為個小說真係好好睇，呢兩個角色好特別。」
畀個機會觀眾
電視大戰的致命死因，就是慣性收視，保怡說：「有一批人去咗睇戲、上網，我哋希望吸引番一班冇辦法而放棄電視嘅觀眾返番嚟。至於慣性嗰班可唔可以吸引到，我真係唔知，計收視嗰班可能我吸引唔到返嚟，因為佢已經慣咗，係咪？」
保怡續說：「可能我哋係叫好唔叫座，但係咁樣，打仗嚟講係咪輸呢？我覺得唔係喎！我哋有口碑，畀觀眾一條新嘅選擇路，ViuTV仲有其他節目，有幾個我都想睇，兩個水火不容嘅人擺埋一齊，啲女仔點樣打MMA，真係拳拳到肉，返到去睇到《瑪嘉烈與大衛》都會想睇。呢個電視戰對香港嚟講得益都係觀眾，無論你係惡評又好，好評又好，都係我哋得益，畀多個機會自己睇多一條channel，唔好睇咪去返舊台都得。」
開台提提你：雙宋記者會
ViuTV開台重頭韓劇《太陽的後裔》男女主角宋仲基與宋慧喬，今日中午12時現身中環四季酒店為ViuTV宣傳。兩人昨日抵港已掀起全城熱潮，今日正式登場定必哄動。