阿仙奴中場韋舒亞（左）當初以英格蘭超新星嘅姿態爆紅，可惜之後傷患纏身，又唔多自愛成日去蒲，試過被拍到煲煙同食水煙，仲因襲擊他人被捕，加上佢又鍾意將生活點滴上載社交網站，有口痕友話佢不如做兵工廠Social Media Manager好過。近日韋舒亞又出嚟話要盡快操「弗」自己，爭取踢今夏歐國盃，點知言猶在耳，喺周日凌晨兩點幾倫敦街頭發生打鬥，佢竟然又在場，仲被警方問話！雖然韋舒亞強調自己只係路過夜店門外，但有圖有片，睇嚟佢又要俾阿仙奴領隊雲格照肺喇！
