通常頂級聯賽嘅神奇球隊，都唔可以由頭帶到尾，但英超嘅李斯特城似乎可以打破呢個魔咒！佢哋周日迎戰修咸頓表現唔算好，但憑住帶病上陣嘅後衞韋斯摩根入波小勝1:0，目前喺聯賽榜領先次席嘅熱刺七分，只要餘下六場聯賽贏四場，就唔使理其他球隊戰績，可以首次喺英超封王；連英國博彩公司Betfred，都提早向買咗李城奪標嘅投注人士派彩。
賽後李城領隊雲尼亞里亦好激動咁話：「我哋再次證明質疑我哋嘅人係錯嘅！今場鬥修咸頓，雖然壓力好大，但我哋成功全取三分。」唔講唔知，原來喺上年同期，李城仲差七分先至可以成功護級，但佢哋𠵱家就喺聯賽榜首領先七分，果然世事如棋。其實李城可以險勝，亦可能係班主維猜帶旺佢哋，因為喺四月四日生日嘅維猜（箭嘴示），特登提早一日喺周日慶祝，仲請入場球迷飲啤酒同食冬甩。