雷神莫雷拉剛戰冇馬贏，最叻只係「華恩庭」跑第二，輸到馬迷牙痛咁聲。不過本周三(6日)泥地夜馬，騎師王如果唔捧雷神，真係冇其他更佳選擇。
點解咁講，今期雷神除咗慣性騎足八場，擁有大批實力馬外，仲要大部份座騎抽內檔，如「現代財星」、「行星」、「包裝鬥士」、「天長地久」及「心花怒放」都排1至5檔，「川河猛駒」稍差亦有6檔，咁你話係咪連個天都幫埋雷神？
睇番「天長地久」，上仗喺泥地排11檔負130磅兼用湯智傑，都拼入一席亞軍，狀態同實力都毋須懷疑，今次用雷神，你話騎功高湯智傑幾多班？仲要排個1檔，真係跑第二都唔開心。
至於苗廐「心花怒放」，泥地性能有幾好唔使多講，今季4次配雷神得冠亞季殿各1，今朝雷神同苗禮德喺隧道口傾咗好耐，話題梗係圍繞「心花怒放」身上，有晒搏殺手影，隻馬排2檔沿途慳力，亦有助應付今次增程初跑一哩，絕對係牌面馬囉！