香港天氣又開始熱返！最近行腦場時都覺得有少少微汗了，又係時候同屋企電子產品，想想降溫方案，須知熱力是所有電子產品天敵，會影響到使用效能之外，嚴重者還會降低它們的使用壽命。
最近長煲PS4隻《Tom Clancy's The Division》！由於遊戲機使用咗一段時間，所以我都開始考慮幫佢入把外置風扇，之前行好多Game舖都講緊$250-$320呢類價位，最近見到有腦場舖頭，將一款DOBE Super Cooling Fan做特價，係好決絕地下調到$99，唔過百係一個心理關口價，買起上嚟會冇咁肉赤。
按照機身設計，DOBE Super Cooling Fan可以加裝在PS4機尾，而且內置有5把電腦用的散熱扇，可以幫你部PS4吹吹風；風力調校使用三段式設計，分別為風力全開的Turbo、正常均速送風的ON，及按照PS4機身熱度而自動調節5把散熱風扇開關的AUTO，就個人覺得，開Turbo真係會有少少抽風聲，相對Auto及ON會比較寧靜。
除了放PS4還有其他用途嗎？我是買了兩把的！一把放PS4之外，另一把我是放在桌面電腦的芒頂，主要貪佢送風範圍夠晒闊，用兩粒寶貼萬用膠就可以黏實在芒頂之餘，仲可以隨意調校角度（只要加厚寶貼萬用膠，做成斜面即可）。
點解唔用芭蕉扇？一來芭蕉扇相對會較嘈，最重要是好多時只能放枱面，佔地方之餘、仲只能夠吹到Keyboard上的手指，咁又點夠微風吹臉咁舒服呢？需知半夜開工「過熱」，會大大降低工作能力，嚴重者會好易眼瞓又唔想打稿……
查詢：展昇（深水埗黃金商場地面42至44號舖）
記者、攝影：朱崇德
