金像獎頒獎典禮畀咗個驚喜大家，極具爭議性甚至惹嚟官媒批評嘅獨立電影《十年》，竟然撼低其他大卡士、大製作攞咗最佳電影，難怪觀眾拍爛手掌。政界都有唔少《十年》粉絲，包括會計界立法會議員梁繼昌同東區區議員徐子見，佢哋兩位都喜孜孜，大讚金像獎極度有吉士。
不得不提嘅粉絲包括梁繼昌，前晚佢盛裝親臨頒獎禮，專誠捧《十年》場；得悉《十年》攞獎後佢激彈起身拍手，激動時刻俾網民cap圖瘋傳。
徐子見讚評審有吉士
八方問過梁繼昌，佢話為金像獎核數嘅人士中有啲係佢朋友，加上認識主辦單位，所以可以入場觀禮。睇過《十年》又睇過《踏血尋梅》嘅梁繼昌不諱言，《踏血尋梅》製作認真，但金像獎賽果係經過專業評審評分，力撐賽果係專業決定：「最佳電影畀一套好創新、題材敏感嘅本地製作，我諗好多香港人都係好滿意呢個成績。」佢強調個獎係對年輕電影人嘅鼓勵，絕對唔認同係「政治綁架專業」。兩個月前曾經包場舉辦《十年》免費放映會嘅佢仲話，如果有時間同地方，一定會再搞。
至於近月聯同唔同團體組織走入社區搞《十年》放映會嘅東區區議員徐子見，前晚亦喺電視機前面見證《十年》攞獎，對賽果高叫「好開心」。其實徐子見前前後後睇過《十年》4次，最鍾意講述本土意識嘅〈本地蛋〉故事，最希望市民觀看《十年》之後反思：「究竟我哋想要一個點樣嘅未來？」
徐子見話喺社會失焦嘅時候，好感動仍然有大批市民捧《十年》場，「尤其相對其他電影作品，《十年》啲導演係好年輕、冇可能同啲大師級比，製作費都係50萬，但好開心都有市民肯支持」。問到金像獎今次係咪有吉士？佢話：「好唔錯，非常有吉士。」
李八方
mailto:[email protected]